Украінскія тэлеграм-каналы ў панядзелак распаўсюдзілі відэа і фота, на якіх расійскія вайскоўцы паказваюць забітага і разабранага зубра. «Агентство» высветліла асобы некалькіх вайскоўцаў — яны прыехалі на вайну з Якуціі, некаторыя з іх загінулі яшчэ ў 2024 годзе.
Як напісаў праўкраінскі тэлеграм-канал Para Pax, які апублікаваў фота і відэа адным з першых, на кадрах — забіты чырванакніжны зубр. Украінскае інфармагенцтва УНІАН пазней удакладніла, што забіты зубр з запаведніка на акупаванай частцы поўдня Украіны.
На фота сапраўды зубр, пацвердзіў «Агентству» супрацоўнік рабочай групы па ацэнцы ўплыву вайны на экалогію UWEC Яўген Сіманаў. Паводле яго, гэта «малалікі від дзікіх кароваў, які быў адноўлены амаль з нуля» і знаходзіцца пад пагрозай. Зубр унесены ў Чырвоныя кнігі Украіны, Расіі і Беларусі.
Паводле эксперта, у публікацыі УНІАН гаворка можа ісці пра запаведнік «Асканія-Нова» ў акупаванай частцы Херсонскай вобласці — гэта адзінае месца на паўднёвым усходзе краіны, дзе жывуць зубры. Аднак Сіманаў сумняваецца, што там магла быць забітая жывёліна з відэа. «Там РФ ужо стварыла свой „новы“ запаведнік з новай адміністрацыяй. Вельмі малаімаверна, каб такое там дапусцілі. Акрамя таго, там такога лесу ў прынцыпе быць не можа, як і на ўсім поўдні», — дадаў ён.
Згодна з Чырвонай кнігай Украіны, папуляцыі зуброў захаваліся ў Валынскай, Кіеўскай, Сумскай, Львоўскай, Івана-Франкоўскай, Чарнавіцкай і Вінніцкай абласцях.
Сіманаў дапусціў, што альбо відэа было знятае ў 2022 годзе, альбо на кадрах Расія ці Беларусь.
Аналіз «Агентства» паказаў, што відэа, імаверна, было знятае ў першай палове 2024 года. Верхам на зубры сфатаграфаваўся 35-гадовы жыхар вёскі Цехцюр Рэспублікі Якуція Юрыс Шышыгін. У 2000−2010-х ён неаднаразова быў судзімы за крадзяжы, рабаванні і ўцягванне ў злачынную дзейнасць няпоўнагадовага. Мяркуючы са старонкі Шышыгіна «ВКонтакте», на вайну ён трапіў у пачатку 2024 года. У сакавіку 2024 года ён апублікаваў фота, на якім разам з 42-гадовым добраахвотнікам з Якуціі Ягорам Меснікавым яны пазіравалі ў вайсковай форме і з шашлыком у руках. Паводле звестак базы загінулых расійскіх вайскоўцаў «Медыязоны», абодва мужчыны загінулі вясной таго ж года: Меснікаў — у красавіку, Шышыгін — у траўні.
Відэа, на якім вайскоўцы пераносяць тушу жывёліны, здымаў 51-гадовы ўраджэнец якуцкай вёскі Тайбахой Ягор Дзмітрыеў. Да вайны ён працаваў загадчыкам вытворчасці ў кампаніі «Ягады Якуціі», сведчаць уцечкі.