Дональд Трамп назваў «вельмі добрымі і прадуктыўнымі» перамовы з Уладзімірам Пуціным, якія адбыліся напярэдадні. Пра гэта прэзідэнт ЗША напісаў у сваёй сацсетцы Truth Social.
«Учора ў нас былі вельмі добрыя і прадуктыўныя перамовы з прэзідэнтам Расіі Уладзімірам Пуціным, і ёсць вельмі добрыя шанцы, што гэтая жудасная, крывавая вайна нарэшце скончыцца — АЛЕ Ў ГЭТЫ САМЫ МОМАНТ ТЫСЯЧЫ ЎКРАІНСКІХ ВОЙСКАЎ ЦАЛКАМ АКРУЖАНЫЯ РАСІЙСКІМІ ВОЙСКАМІ І ЗНАХОДЗЯЦЦА Ў ВЕЛЬМІ ЎРАЗЛІВЫМ СТАНОВІШЧЫ. Я настойліва прасіў прэзідэнта Пуціна захаваць ім жыцці. Гэта будзе жудасная бойня, нябачаная з часоў Другой сусветнай вайны. Хай блаславіць іх усіх Бог!!!» — напісаў Трамп.
Нагадаем, у чацвер вечарам, 13 сакавіка, Уладзімір Пуцін правёў рабочую сустрэчу са спецпрадстаўніком ЗША Стывенам Уіткафам. Афіцыйна яе падрабязнасці не агучваліся. Раней у чацвер днём, адказваючы на пытанне наконт прапанаванага ЗША 30-дзённага спынення агню, Пуцін заявіў, што «мы за перамір'е, але ёсць нюансы». Пералічваючы аспекты, якія неабходна абмеркаваць для перамір'я, Пуцін згадаў сітуацыю ў Курскай вобласці. Ён заявіў, што спыненне агню выгаднае Украіне, бо ўкраінскія сілы на Куршчыне знаходзяцца пад поўным расійскім агнявым кантролем і «калі найбліжэйшымі днямі адбудзецца фізічнае блакаванне, то выйсці наогул ніхто не зможа. Будзе толькі два спосабы: здацца ў палон ці загінуць».
Украінскае вайсковае камандаванне гэтай інфармацыі ніяк не каментавала. Прэзідэнт Украіны Уладзімір Зяленскі назваў заяву Пуціна маніпулятыўнай і абвінаваціў яго ў жаданні працягнуць вайну.
