Падраздзяленні Галоўнага ўпраўлення разведкі (ГУР) Міністэрства абароны Украіны вызвалілі ад расійскіх войскаў Ваўчанскі агрэгатны завод. Крыніцы «Новай-Еўропа» называюць гэты аб’ект самым важным вузлом абароны арміі РФ у горадзе Ваўчанск Харкаўскай вобласці.
Паводле інфармацыі ГУР, захоп прадпрыемства, на тэрыторыі якога знаходзілася 30 розных будынкаў, правялі спецыяльныя групы «Стугна», «Парагон», «Тэрор», «Юнгер», «Беларускі добраахвотніцкі корпус» (БДК) і «Рускі добраахвотніцкі корпус» (РДК).
Расіяне ператварылі агрэгатны завод у сапраўдную крэпасць, задзейнічаўшы ў яго абароне самыя матываваныя і прафесійныя падраздзяленні, сярод якіх былі байцы 45-й брыгады паветрана-дэсантных войскаў. Акрамя таго, супраць украінскіх выведнікаў бесперапынна выкарыстоўвалася артылерыя, ударныя дроны-камікадзэ, КАБы і цяжкія агнямётныя сістэмы «Санцапёк». Нягледзячы на зацяты супраціў ворага, байцам ГУР МАУ ўдалося знішчыць праціўніка, узяць палонных і папоўніць абменны фонд.
— На сённяшні дзень горад Ваўчанск практычна цалкам разбураны, — расказвае «Новай-Еўропа» начальнік штаба РДК Аляксандр «Фартуна».
— Гэта звычайны для Расіі спосаб вядзення баявых дзеянняў: населеныя пункты проста сціраюцца з твару зямлі.
Ва ўсім Ваўчанску засталося ўсяго некалькі параўнальна цэлых будынкаў. У асноўным гэта прамысловыя аб’екты. Агрэгатны завод размешчаны ў паўднёвай частцы шматпавярховай забудовы. Яго тэрыторыю абгінае рака, што дадаткова палягчае абарону. Праціўнік мог выкарыстаць гэты ўчастак для канцэнтрацыі жывой сілы і тэхнікі.
Паводле Аляксандра, яшчэ ў траўні, пасля пачатку наступу войска РФ на Харкаўскую вобласць, расіяне пачалі ператвараць агрэгатны завод у сур’ёзны ўмацаваны раён. У выніку контрнаступальных дзеянняў УСУ прыкладна рота расійскіх войскаў аказалася на прадпрыемстве адрэзанай ад асноўных сіл. Расіяне наладзілі перакідванне акружаным харчавання, боекамплектаў і прадуктаў першай неабходнасці. Самі салдаты Узброеных сіл РФ, якія трапілі ў кацёл, знайшлі на заводзе запасы паліва і выкарыстоўвалі электрагенератары. Яны выкапалі дзве студні, з якіх бралі ваду. Асвоілі падземныя камунікацыі і калектары, размешчаныя пад заводам. Будынкі былі ўзведзеныя за савецкім часам, і іх сцены не прабівала нават цяжкая артылерыя.
Начальнік штаба РДК параўноўвае баі за агрэгатнае прадпрыемства са Сталінградскай бітвай.
— Асноўная частка аперацыі па вызваленні завода пачалася прыкладна тыдзень таму, — працягвае Аляксандр «Фартуна». — Нашым байцам давялося штурмаваць завод і ўсю яго інфраструктуру. Вораг аказваў жорсткі супраціў. Нярэдка пазіцыі бакоў дзяліла літаральна некалькі метраў. Мы выкарыстоўвалі буйнакаліберныя кулямёты, каб разбурыць умацаванні і барыкады, збудаваныя расіянамі.
Аднойчы ў начны час праціўнік напаў на нашых байцоў з нажамі ў руках. Адбылася сапраўдная рукапашная.
Большасць расіян, якія абаранялі агрэгатны завод, загінула падчас штурму. Аднак нейкая іх колькасць трапіла ў палон. Байцы РДК і УСУ неаднаразова прапаноўвалі салдатам арміі РФ здацца. Але тыя адмаўляліся. РДК і іншыя падраздзяленні, якія ўдзельнічалі ў штурме, панеслі страты. У Рускім добраахвотніцкім корпусе загінула некалькі байцоў. Адзін расійскі добраахвотнік, які ваюе на баку Украіны, атрымаў цяжкае раненне. Некалькі яго таварышаў былі лёгка параненыя.
Фронт у Харкаўскай вобласці ўмоўна можна падзяліць на кірунак на поўнач ад Ваўчанска і на тэрыторыю самога горада і прылеглыя ўчасткі. У населеным пункце УСУ і падраздзяленні ГУР МАУ бяруць пад свой кантроль апорныя пункты непрыяцеля і выцясняюць расіян да мяжы.
— Пасля пачатку наступу УСУ ў Курскай вобласці змянілася інтэнсіўнасць авіяналётаў на нашыя пазіцыі на Харкаўскім напрамку, — заканчвае аповед Аляксандр «Фартуна». — Бамбёжкі адбываюцца радзей, але расіяне выкарыстоўваюць больш цяжкія бомбы. Калі раней гэта былі ФАБ-100 і ФАБ-250 з камплектамі планіравання, то нядаўна на ўкраінцаў скінулі трохтонныя ФАБ-3000. Нашая выведка своечасова даведваецца пра перакідванне рэзерваў і тэхнікі РФ і знішчае іх на падыходзе. Расіянам няма дзе канцэнтраваць свае сілы, бо ад Ваўчанска засталіся адны руіны. РДК працягне ўдзел у бітвах на самых гарачых участках фронту.