Праз 75 гадоў пасля прызнання Ізраіля як незалежнай дзяржавы Нарвегія стала 144-й краінай ААН, якая таксама прызнала Палестыну, паведаміла NRK. Аналагічныя заявы зрабілі ў Ірландыі і Іспаніі.
Пра прызнанне Палестыны як незалежнай дзяржавы 22 траўня заявіў прэм’ер-міністр Нарвегіі Ёнас Гар Стэрэ. Гэтае рашэнне набудзе моц 28 траўня.
«Калі мы прызнаем Палестыну, мы зможам больш рашуча заахвочваць іншыя краіны падтрымліваць будаўніцтва палестынскай дзяржавы і зможам прыцягнуць палестынскую дзяржаву да адказнасці», — адзначыў Стэрэ.
У Палестыны ёсць уласнае консульства ў Нарвегіі з 2011 года, нарвежскія ўлады пачалі выкарыстоўваць слова «Палестына» ў дачыненні да палестынскіх тэрыторый, а раней у траўні Нарвегія прагаласавала за сяброўства Палестыны ў ААН.
Як піша NRK, міністр замежных справаў Нарвегіі Эспен Барт Эйдэ раней падкрэсліваў, што для Нарвегіі важная адзіная палестынская дзяржава: «Мы хочам не „дзяржавы ХАМАС“, а адной палестынскай дзяржавы, якая палітычна трымаецца разам і якая ўзнікла на базе Палестынскай аўтаноміі».
Акрамя таго, прызнаць Палестыну як незалежную дзяржаву 22 траўня планавалі таксама Ірландыя і Іспанія, адзначала выданне Politico. Так і атрымалася — абедзве краіны зрабілі аналагічныя заявы, рашэнні набудуць моц таксама 28 траўня, піша Irish Times.
Чальцы Еўрапейскага саюза Славенія і Мальта таксама заяўлялі ў апошнія тыдні, што плануюць дабівацца прызнання Палестыны. Там сцвярджаюць, што рашэнне пра стварэнне дзвюх дзяржаваў мае важнае значэнне для трывалага міру на Блізкім Усходзе.
Ізраіль заявіў, што адклікае амбасадараў у Нарвегіі і Ірландыі для кансультацый.
«Сёння я дасылаю выразны сігнал Ірландыі і Нарвегіі: Ізраіль не пакіне гэтага проста так. Я толькі што загадаў адклікаць амбасадараў Ізраіля ў Дубліне і Осла ў Ізраіль для далейшых кансультацый у Ерусаліме», — паведаміў міністр замежных справаў краіны Ісраэль Кац.
На гэты момант незалежнасць Палестыны прызналі больш за 140 дзяржаваў — сябраў ААН, у тым ліку Беларусь, Расія, Украіна, краіны Усходняй Еўропы, Паўднёвай Амерыкі, Афрыкі, Кітай, Індыя. Не прызналі — большасць дзяржаваў Заходняй Еўропы, ЗША, Канада, Аўстралія, Японія.