Камандуючы Паветранымі сіламі Украіны Мікалай Аляшчук заявіў, што ў Крыме знішчаны расійскі ваенны карабель «Новачаркаск». У Міністэрстве абароны Расіі заявілі, што карабель атрымаў пашкоджанні.
— Гэтым разам услед за флагманам ЧФ РФ — крэйсерам «Масква» — ідзе вялікі дэсантны карабель «Новачаркаск». Дзякую пілотам Узброеных сіл і ўсім датычным за філігранную працу! — напісаў у сваім тэлеграм-канале Аляшчук.
Магутныя выбухі ў Крыме прагрымелі ў тры гадзіны ночы. Кіраўнік акупацыйнай адміністрацыі паўвострава Сяргей Аксёнаў паведаміў, што тэрыторыя порта ачэпленая, «дэтанацыя спынілася, пажар лакалізаваны».
— На жаль, у выніку варожай атакі ў Феадосіі загінуў адзін чалавек, двое параненыя. Пашкоджанні атрымалі шэсць будынкаў — у асноўным выбітыя вокны. Шэсць чалавек эвакуяваныя ў пункты часовага размяшчэння, астатнія жыхары размясціліся ў родных і знаёмых, — паведаміў ён праз пяць гадзін.
У Міністэрстве абароны Расіі заявілі, што дэсантны карабель «Новачаркаск» атрымаў пашкоджанні «падчас адбіцця ўдару УСУ з выкарыстаннем авіяцыйных кіравальных ракет».
«Падчас супрацьпаветранага бою сродкамі СПА знішчаныя два ўкраінскія Су-24, якія ажыццяўлялі пуск ракет», — цытуе РІА «Новости» паведамленне Мінабароны РФ.
«Новачаркаск» ужо другі раз трапляе ў зводкі здарэнняў. У сакавіку 2022 года Украіна нанесла ўдар па порце акупаванага Бярдзянска, пашкоджанні атрымалі расійскія вялікія дэсантныя караблі «Новачаркаск», «Орск», «Цэзар Куннікаў», «Саратаў» быў патоплены.
Вялікі дэсантны карабель «Новачаркаск» прызначаны для высаджвання марскога дэсанту на неабсталяванае ўзбярэжжа і перакідвання морам войскаў і грузаў. Здольны транспартаваць розныя віды бранятэхнікі, уключаючы танкі.
