Прапанова Аляксандра Лукашэнкі спыніць баявыя дзеянні ва Украіне, магчыма, будзе абмяркоўвацца на блізкай сустрэчы з Уладзімірам Пуціным. Пра гэта заявіў прэс-сакратар расійскага прэзідэнта Дзмітрый Пяскоў.
Як заявіў Пяскоў, Уладзімір Пуцін і Лукашэнка на наступным тыдні могуць абмеркаваць гэтую тэму.
— Безумоўна, мы чулі заяву Аляксандра Рыгоравіча, безумоўна, два прэзідэнты, я маю на ўвазе Пуцін і Лукашэнка, працягнуць на наступным тыдні (камунікацыю). А менавіта на наступным тыдні будзе паседжанне Найвышэйшага дзяржаўнага савета Саюзнай дзяржавы — гэта дасць магчымасць прэзідэнтам яшчэ раз грунтоўна пагаварыць адзін з адным. Напэўна будуць і гэтую тэму абмяркоўваць, — сказаў Пяскоў.
Пры гэтым ён дадаў, што для Украіны гэта нічога не мяняе.
— Працягваецца СВА (спецыяльная ваенная аперацыя, як у Расіі называюць поўнамаштабнае ўварванне ва Украіну. — Заўв. рэд.) бо гэта адзіны сродак дасягнення мэтаў, — перакананы Пяскоў.
Выступаючы з пасланнем да народа і парламента, Аляксандр Лукашэнка заявіў, што вайну ва Украіне неабходна спыніць проста цяпер, «пакуль не пачалася эскалацыя». На яго думку, баявыя дзеянні неабходна спыніць «без права перамяшчэння, перагрупоўкі войскаў, без права перакідання зброі, боепрыпасаў, жывой сілы і тэхнікі».
Паседжанне Найвышэйшага дзяржсавета Саюзнай дзяржавы з удзелам Уладзіміра Пуціна і Аляксандра Лукашэнкі прызначанае на 6 красавіка.
Паводле матэрыялаў РБК і РІА «Новости».