Расійскі знішчальнік Су-27 падчас перахопу пашкодзіў над Чорным морам амерыканскі разведвальны БПЛА MQ-9, паведамілі ў Еўрапейскім камандаванні Узброеных сіл ЗША.
«Сёння два расійскія Су-27 здзейснілі небяспечны і непрафесійны перахоп БПЛА разведкі, назірання і рэкагнасцыроўкі MQ-9 ВПС ЗША, які знаходзіўся ў міжнароднай паветранай прасторы над Чорным морам», — гаворыцца ў заяве.
Паведамляецца, што інцыдэнт адбыўся раніцай. Адзін з расійскіх самалётаў Су-27 зачапіў турбавінтавы рухавік MQ-9, у выніку чаго вайскоўцы ЗША былі вымушаныя затапіць беспілотнік у міжнародных водах.
«Некалькі разоў перад сутыкненнем Су-27 злівалі паліва на MQ-9 і праляталі перад ім безразважным і непрафесійным спосабам. Гэты інцыдэнт дэманструе не толькі недахоп кампетэнтнасці, але і небяспеку і непрафесіяналізм», — заявілі вайскоўцы.
Паводле звестак амерыканскага камандавання, MQ-9 выконваў «руцінныя аперацыі ў міжнароднай паветранай прасторы, калі яго перахапіў і збіў расійскі самалёт».
Мінабароны Расіі: Расійскія знішчальнікі з беспілотным лётным апаратам у кантакт не ўступалі
У Міністэрстве абароны Расіі заявілі, што раніцай 14 сакавіка над акваторыяй Чорнага мора ў раёне Крымскага паўвострава сродкамі кантролю паветранай прасторы ВКС быў зафіксаваны палёт амерыканскага беспілотнага лётнага апарата MQ-9 у кірунку мяжы Расійскай Федэрацыі.
Паводле ведамства, палёт БПЛА ажыццяўляўся з выключанымі транспондарамі з парушэннем межаў раёна часовага рэжыму выкарыстання паветранай прасторы, «устаноўленага з мэтай правядзення спецыяльнай ваеннай аперацыі, даведзенага да ўсіх карыстальнікаў міжнароднай паветранай прасторы і апублікаванага ў адпаведнасці з міжнароднымі нормамі».
«З мэтай ідэнтыфікацыі парушальніка ў паветра былі паднятыя знішчальнікі са складу дзяжурных па СПА сіл. У выніку рэзкага манеўравання беспілотны лётны апарат MQ-9 перайшоў у некіравальны палёт са стратай вышыні і сутыкнуўся з воднай паверхняй. Расійскія знішчальнікі бартавое ўзбраенне не выкарыстоўвалі, з беспілотным лётным апаратам у кантакт не ўступалі і шчасліва вярнуліся на аэрадром базавання», — адзначылі ў Мінабароны Расіі.
Белы дом: ЗША працягнуць палёты беспілотнікаў над Чорным морам
ЗША працягнуць палёты над Чорным морам, нягледзячы на інцыдэнт з амерыканскім дронам, які, як сцвярджае Вашынгтон, быў збіты расійскім знішчальнікам Су-27, заявіў каардынатар стратэгічных камунікацый у Савеце нацыянальнай бяспекі Белага дома Джон Кірбі, піша Руская служба Бі-бі-сі.
«Калі сігнал заключаецца ў тым, што яны хочуць стрымаць або адгаварыць нас ад палётаў і аперацый у міжнароднай паветранай прасторы, над Чорным морам, то гэты сігнал пацярпіць няўдачу, бо гэтага не адбудзецца, — сказаў Кірбі. — Мы будзем працягваць лётаць і дзейнічаць у міжнароднай паветранай прасторы над міжнароднымі водамі».
«Чорнае мора не належыць ніводнай краіне. І мы збіраемся працягваць рабіць тое, што неабходна для аховы інтарэсаў нашай нацыянальнай бяспекі ў гэтай частцы свету», — дадаў ён.