Брытанскае выданне Sky News, спасылаючыся на свае крыніцы ў службе бяспекі, паведамляе, што Іран таемна пастаўляў вялікую колькасць куляў, ракет і мінамётных снарадаў у Расію для вайны ва Украіне і плануе павялічыць пастаўкі.
Паводле звестак крыніцы Sky News, два грузавыя судны пад расійскім сцягам — Musa Jalil і Begey — пакінулі іранскі порт у студзені гэтага года, накіроўваючыся ў Расію праз Каспійскае мора. Яны перавозілі каля 100 мільёнаў куляў і каля 300 тысяч снарадаў. Крыніца ў службе бяспекі не пацвердзіла назву порта ў Іране, з якога выйшлі два караблі, і ў які порт Расіі яны прыбылі. Яна толькі сказала, што караблі накіроўваліся ў Расію праз Каспійскае мора.
«Расія працягвае выкарыстоўваць Іран у якасці „тылавой базы“», — сказала крыніца, апісваючы цесныя ваенныя сувязі паміж дзвюма краінамі.
Крыніца выдання таксама паведаміла, што адзін з караблёў, як мяркуюць, пакінуў Іран каля 10 студзеня, а другі — каля 12 студзеня. Паводле яе, два судны перавозілі каля 200 марскіх кантэйнераў, напоўненых зброяй.
Аднак журналістам не ўдалося праверыць дакладны аб’ём меркаванай ваеннай дапамогі.
Sky News звярнулася да ўладальніка караблёў у Расіі па каментар з нагоды меркаванай перавозкі зброі, але адказу дагэтуль няма.
Міністэрства абароны Расіі і Міністэрства замежных справаў Ірана таксама яшчэ не адказалі на запыт пра каментары.
Што кажуць дадзеныя марскога сачэння
Даследаванне, праведзенае аддзелам дадзеных і крыміналістыкі Sky News, пацвердзіла агульнае сцверджанне пра рух караблёў, хоць даты трохі адрозніваліся.
Аднак праверыць, што менавіта перавозілася суднамі, не ўяўлялася магчымым.
Марскі суднаходны трэкер MarineTraffic паказаў два караблі ў іранскім порце Амірабад на Каспійскім моры 9 студзеня.
Спадарожнікавыя здымкі з наступнага дня, атрыманыя Sky News, сведчаць, што прынамсі адзін з караблёў у гэты час усё яшчэ знаходзіўся ў порце
Паводле дадзеных марскога сачэння, Musa Jalil пакінуў порт раніцай 10 студзеня. Begey з порта выйшаў у той жа дзень.
12 студзеня, паводле звестак сачэння, абодва судны спыняліся ля берагоў Туркменістана на пару дзён. Прычына прыпынку невядомая.
Затым караблі перасеклі Каспійскае мора, прыбыўшы ў Астрахань 27 студзеня. Яны заставаліся тут некалькі дзён. Гэты порт яны пакінулі 3 лютага.
Што ў грузе?
Крыніца паведаміла, што меркаваны груз складаецца з прыкладна 100 мільёнаў куляў розных памераў для пісталетаў, штурмавых вінтовак і кулямётаў.
Таксама на караблях быў шэраг іншых боепрыпасаў, у тым ліку каля 300 тысяч снарадаў, такіх як 40-мм гранаты для гранатамётаў, 107-мм супрацьтанкавыя ракеты і мінамётныя снарады розных памераў.
Акрамя таго, крыніца паведаміла, што на борце знаходзілася каля 10 тысяч бронекамізэлек і шлемаў.
«Расія плаціць за боепрыпасы наяўнымі і тым самым абыходзіць заходнія санкцыі па іх, ігнаруючы санкцыі ў дачыненні да Ірана», — дадала крыніца.
Заходнія і ўкраінскія афіцыйныя асобы таксама папярэджваюць, што Іран можа пастаўляць значна больш смяротныя балістычныя ракеты, але пакуль няма ніякіх доказаў таго, што гэта адбываецца.
Разам з іранскай падтрымкай у заходніх сталіцах расце занепакоенасць з нагоды таго, што Кітай можа пачаць пастаўляць Расіі зброю — крок, які, як папярэджваюць Злучаныя Штаты, будзе мець «сур'ёзныя наступствы» для Пекіна. Кітай жа абверг гэтыя сцверджанні.
