Урад Украіны вырашыў аб’яднаць два міністэрствы: інфраструктуры і рэгіянальнага развіцця. Узначаліць новае ведамства, якое будзе займацца развіццём суполак, тэрыторый і інфраструктуры Украіны, новы віцэ-прэм'ер — Аляксандр Кубракоў. Паводле звестак украінскіх і беларускіх СМІ, новы віцэ-прэм'ер — пляменнік кіраўніка МУС Беларусі Івана Кубракова.
1 снежня ў Вярхоўную Раду ўнеслі прадстаўленне на прызначэнне Аляксандра Кубракова на пасаду віцэ-прэм'ер-міністра па аднаўленні Украіны — міністра развіцця супольнасцяў, тэрыторый і інфраструктуры. За гэтае прызначэнне прагаласавалі 263 нардэпы.
Пляменнік ці не?
Украінскія і беларускія СМІ не раз паведамлялі пра тое, што Аляксандр Кубракоў — сваяк кіраўніка МУС Беларусі Івана Кубракова.
У сям'і Івана Кубракова, які нарадзіўся ў вёсцы Малінаўка Касцюковіцкага раёна Магілёўскай вобласці, было пяцёра дзяцей. Старэйшы, Мікалай, нарадзіўся ў 1960 годзе, у 1961 — Міхаіл, у 1964 — Віктар, у 1969 — Сяргей, а ў 1975 — Іван. Мікалая і называюць бацькам новага віцэ-прэм'ера Украіны. Адзначаецца, што ён першым з братоў пайшоў працаваць у міліцыю.
Я раней расказвала TUT.BY цётка кіраўніка МУС Беларусі Валянціна Мацвееўна, Мікалай Кубракоў сапраўды пайшоў служыць у міліцыю і з’ехаў у Мінск, але ўжо выйшаў на пенсію па выслузе гадоў і працуе на грамадзянцы. Пра нейкія яго сувязі з Украінай яна не згадвала.
А менавіта ва Украіне, а дакладней у горадзе Першатравенск Днепрапятроўскай вобласці, і нарадзіўся Аляксандр Кубракоў, якога называюць пляменнікам кіраўніка МУС Беларусі.
Асабліва тэма магчымага сваяцтва пачала мусіравацца пасля жорсткага здушэння пратэстаў у 2020 годзе ў Беларусі. СМІ абураліся тым фактам, што кіраўнік ведамства «Украўтадар» Аляксандр Кубракоў дазваляе беларускім дзяржаўным кампаніям атрымліваць падрады на будаўніцтва дарог ва Украіне: у гэтым бачылі нейкія дамоўленасці паміж сваякамі.
Дарэчы, сам Аляксандр Кубракоў у сваіх інтэрв'ю не расказваў пра бацьку ці дзядзьку, ён таксама ніколі не згадваў і свае беларускія карані.
Зрэшты, сваіх украінскіх сваякоў не згадваў і міністр унутраных справаў Беларусі Іван Кубракоў.
Хто такі Аляксандр Кубракоў?
40-гадовы Аляксандр Кубракоў нарадзіўся ў горадзе Першатравенск Днепрапятроўскай вобласці. Скончыў Кіеўскі нацыянальны эканамічны ўніверсітэт з кваліфікацыяй маркетолага, а таксама кароткатэрміновую праграму ў Школе кіравання імя Джона Кенэдзі.
Быў сузаснавальнікам кіраўнічай кампаніі «Горад для людзей» і фірмы «Еўракамунсэрвіс». Займаўся праектам «Хатні інтэрнэт» ад аператара «Кіеўстар» і ўдзельнічаў у распрацоўцы транспартнай стратэгіі Кіева. Аляксандр Кубракоў займаў пасаду выканаўчага дырэктара асацыяцыі «Інфармацыйныя тэхналогіі Украіны», быў дарадцам мэра Кіева Віталя Клічко ў ІТ-сферы.
З 2019 па 2021 год Кубракоў узначальваў «Украўтадар». Таксама ў 2019 годзе быў абраны ў Вярхоўную Раду Украіны дзявятага склікання ад кіраўнічай партыі «Слуга народа». Увайшоў у склад камітэта па правах чалавека, дэакупацыі і рэінтэграцыі часова акупаваных тэрыторый у Данецкай, Луганскай абласцях і Крыме, горада Севастопаля, нацыянальных меншасцяў і міжнацыянальных адносін. У 2021-м Аляксандр Кубракоў быў прызначаны міністрам інфраструктуры Украіны і займаў названую пасаду да гэтага часу.