Арцёма Зінчанку некалькі гадоў таму асудзілі ў Эстоніі за працу на расійскія спецслужбы. У 2018 годзе яго абмянялі на эстонца, асуджанага ў Расіі за шпіянаж. Праз чатыры гады Зінчанка вярнуўся ў Эстонію і папрасіў палітычнага прытулку, піша ERR.ee.
Паліцыя бяспекі Эстоніі арыштавала Зінчанку ў студзені 2017 года па падазрэнні ў шпіянажы. Пасля ён быў асуджаны на пяць гадоў турэмнага зняволення, але, адседзеўшы каля года, быў памілаваны для абмену на грамадзяніна Эстоніі Райва Сусі, які быў затрыманы ў Расіі па абвінавачванні ў шпіянажы і асуджаны на 12 гадоў калоніі строгага рэжыму. Абмен адбыўся 10 лютага 2018 года на мосце праз раку Піуса.
Праз чатыры гады 35-гадовы Арцём Зінчанка вярнуўся ў Эстонію і папрасіў там палітычнага прытулку. Ён патлумачыў гэта нязгодай з расійскім уварваннем ва Украіну.
«24 лютага для мяне разбурылі ўсё, што было паміж мной і маёй дзяржавай», — сказаў ён.
Зінчанка не стаў падрабязна каментаваць, што адбылося з ім пасля вяртання ў Расію, адзначыўшы, што яго там неўзабаве пакінулі самому сабе і ён сутыкнуўся з «вялікай колькасцю праблем, якія трэба было вырашаць, пачынаючы новае жыццё».
Ён дадаў, што пасля вяртання там усё моцна змянілася і сітуацыя пагаршалася з кожным годам.
«Я бачыў, што тут кіруе рэжым з усімі аспектамі таталітарызму», — сказаў ён, дадаўшы, што пасля 24 лютага ён зразумеў, што ў яго больш няма з Расіяй нічога агульнага.