На прафесара Яна Маліцкага напалі ў цэнтры Варшавы (Польшча). Цяпер ён у бальніцы. Асобы нападнікаў невядомыя, піша «Белсат» са спасылкай на паведамленне дырэктаркі Школы ўсходніх моваў пры Цэнтры Усходняй Еўропы Інгі Катаньскай, якое было дасланае журналістам.
Як перадае «Белсат», у ноч на 20 снежня ў Казіміроўскім парку, размешчаным у цэнтры Варшавы, «быў здзейснены замах на жыццё кіраўніка Цэнтра і дырэктара стыпендыяльнай праграмы імені Кастуся Каліноўскага Яна Маліцкага».
Паводле інфармацыі Катаньскай, двое мужчын спыталі ў Маліцкага, як яго завуць. Калі Маліцкі прадставіўся, атрымаў удар па галаве, страціў прытомнасць. Ён ачуняў у машыне хуткай дапамогі. Прафесара даставілі ў Пражскую бальніцу ў Варшаве.
Усіх, хто мае інфармацыю пра напад, просяць звязацца з паліцыяй ці Агенцтвам унутранай бяспекі Польшчы.
У сакратарыяце Цэнтра Усходняй Еўропы «Белсату» сказалі, што не могуць пацвердзіць рассыланне такой інфармацыі. Школа ўсходніх моваў не адказвае на званкі. Тэлефон Маліцкага пераключаны на галасавую пошту.
Праграма Каліноўскага — польская дзяржаўная праграма дапамогі беларускай моладзі, створаная ў 2006 годзе. Праграма першапачаткова прызначалася для студэнтаў, адлічаных з беларускіх ВНУ з «палітычных» прычын. З часам у праграму таксама пачалі прымаць беларусаў, якія не могуць працягваць адукацыю ў Беларусі праз свае палітычныя погляды, а таксама ўдзельнічалі ў абароне дэмакратыі і правоў чалавека ў Беларусі.
