Яшчэ летам кітайскім дылерам забаранілі прадаваць у Расію электрамабілі Zeekr. У афіцыйным лісце ад кампаніі гаварылася, што абмежаванні пачнуць дзейнічаць пасля 30 чэрвеня. Беларусаў гэта таксама мусіла закрануць, аднак не было зразумела, ці сапраўды завод зможа дыстанцыйна «зацаглініць» аўтамабіль. Цяпер з’явілася пацверджанне: пагрозы не былі пустымі.
З журналістамі звязаўся беларус, які расказаў, што ў Мінску ёсць пяць аўтамабіляў Zeekr, якія былі раней заблакаваныя заводам.
— Мяркуючы з усяго, блакаванне прыляцела ўсім Zeekr 001 2025 мадэльнага года, — дапусціў мужчына. І назваў два аўтацэнтры, у якіх знаходзяцца заблакаваныя машыны.
Журналісты патэлефанавалі ў першы — у MarsCars. Там пацвердзілі: сапраўды паспелі сутыкнуцца з праблемай. Аднак сказаць, што ўвезеныя «Зікры» ператварыліся ў нерухомыя «цагліны», нельга.
— Аўтамабілі пасля блакавання заставаліся ў цалкам працоўным стане. Адзінае, што палову экрана мультымедыя заняло папярэджанне, маўляў, вам неабходна звярнуцца да афіцыйнага дылера. Адзін Zeekr мы ўжо разблакавалі. Другі — у працэсе. Памылка выскачыла, як толькі машыны перасеклі мяжу Кітая, — расказаў нам менеджар праз тэлефон.
— Як удалося разблакаваць аўтамабіль?
— Нашыя партнёры ў Кітаі дамовіліся з прадстаўнікамі завода. Якім канкрэтна чынам — не ведаю. Разблакавалі аўто дыстанцыйна.
— То-бок вашыя спецыялісты нічога не перапрашывалі, не ўзломвалі?
— Не. Была толькі ўсталяваная сім-карта ў блок тэлематыкі для сувязі з інтэрнэтам. Гэта абсалютна стандартная працэдура.
— Дапусцім, што вашыя партнёры не дамовіліся б з заводам. Вашыя спецыялісты змаглі б самастойна разблакаваць аўто?
— 99 працэнтаў, што так. Ужо ёсць варыянты вырашэння праблемы. Гэта не бясплатна, але магчыма. З ходу назваць цаны не магу. Вывучаем цяпер праблему, каб потым мець магчымасць прапанаваць паслугу кліентам.
Прадстаўнік салона расказаў, што іх аўтацэнтр не адзіны ў Мінску, які сутыкнуўся з блакаваннем Zeekr. Журналістам стала вядомая назва другога шоурума. Гэты аўтацэнтр займаецца электрамабілямі, на яго сайце можна знайсці інфармацыю пра тое, што два Zeekr 001 2025 мадэльнага года ёсць «у наяўнасці» і «на складзе». Дарэчы, кошт машын — 169 925 рублёў (48 950 даляраў).
— Я туды тэлефанаваў. Мне па тэлефоне адказалі, што аўтамабілі блакаваліся, «але мы іх разблакавалі». Праз дзень я сам прыехаў у салон, а там стаіць Zeekr з папярэджаннем на мультымедыя, маўляў, функцыі аўтамабіля абмежаваныя, — расказала крыніца.
Журналісты таксама звярнуліся да прадстаўнікоў вышэйзгаданага шоурума. Там запэўнілі, што з блакаваннем Zeekr не сутыкаліся. Аднак папрасілі назвы аўтасалона ў тэксце не згадваць.
Праблема толькі «зікраўская»?
Не толькі ў Zeekr абяцалі блакаваць аўтамабілі, якія ўвозяцца ў нашую краіну паралельным імпартам. Такія пагрозы нядаўна прагучалі ад прадстаўнікоў Avatr. Па дадатковыя тлумачэнні журналісты звярталіся ў Кітай, на завод Changan.
Прадстаўнікі брэнда тады расказалі, што сапраўды разглядаецца магчымасць блакавання некаторых функцый аўтамабіляў, увезеных неафіцыйна. Гэта, відаць, датычыць найперш СМІ. Дыстрыб’ютар удакладніў, што, паводле яго інфармацыі, баяцца варта толькі тым, хто экспартаваў Avatr пасля 1 кастрычніка па шэрай схеме.
Падобная сітуацыя была і з кітайскім брэндам Voyah. Летась аўтамабілі гэтай кампаніі таксама забаранілі ўвозіць у Расію паралельным імпартам. Тады гаварылася, што нібыта Voyah, увезены неафіцыйна, можа стаць у нейкі момант «цаглінай». Такія пагрозы гучалі і на адрас машын, якія прыбываюць у Беларусь. Страшныя прагнозы спраўдзіліся?
— Многія пакупнікі прэміяльных электрычных кітайскіх брэндаў, якія завозяцца ў Беларусь неафіцыйна, сутыкаюцца пасля з праблемамі актывацыі розных функцый аўтамабіляў альбо з немагчымасцю іх паўнавартаснага абслугоўвання ў нашай краіне, — расказалі прадстаўнікі імпарцёра Voyah. — Усё гэта абумоўленае перш за ўсё тым, што гэтыя машыны, якія завозяцца шэрым імпартам, не прызначаныя для замежных рынкаў. З аўтамабілямі Voyah і M-Hero, якія пастаўляюцца праз афіцыйную дылерскую сетку ў Беларусі, такой праблемы няма. Менавіта таму тым, хто плануе куплю новага аўтамабіля, цалкам лагічна варта разглядаць варыянты сярод брэндаў, якія афіцыйна заключылі непасрэдны кантракт з заводам-вытворцам.