Прозвішчы апошніх 12 з 37 палітвязняў, якія выйшлі на волю па памілаванні да Дня народнага адзінства, апублікаваў 18 верасня ў сваім тэлеграм-канале экс-рэдактар NEXTA Раман Пратасевіч.
З калоніі выйшлі: Дзмітрый Лагуценка, Андрэй Ігнатовіч, Дзмітрый Утоўка, Віталь Цыдзік, Канстанцін Саламіюк, Віталь Юрэня, Андрэй Толчын, Сяргей Мардзіловіч, Сяргей Фісюк, Аляксандр Бараноўскі, Ірына Гарачкіна, Юлія Лабунова.
Нагадаем, 16 верасня, напярэдадні Дня народнага адзінства, Аляксандр Лукашэнка падпісаў указ пра памілаванне 37 чалавек, асуджаных за «злачынствы экстрэмісцкай скіраванасці».
Раней стала вядома, што сярод 37 памілаваных — Аляксандр Рукойць, Аляксандр Пугач, Дзмітрый Кушалевіч, Алег Завадскі, Аляксандр Жук, Мікалай Амельчанка, Дзмітрый Сінюта, Сяргей Мазоль, Віталь Санька, Андрэй Рамановіч, Аляксандр Фікаў, Таццяна Біруля, Анжэла Сікорская, Міхаіл Корзун, Кацярына Джыга, Аляксандр Емяльянаў, Ігар Барысаў, Аляксандр Пастарняк, Уладзіслаў Папоў, Аляксандр Жандораў, Сяргей Мацюхевіч, Яўген Нарэйка, Андрэй Астрацоў, Віталь Чарнавусаў і Зоя Баранава.
Гэта ўжо чацвёртая хваля памілаванняў палітвязняў за апошні час. 4 верасня стала вядома пра выхад на волю 30 асуджаных па «палітычных» артыкулах. Сярод іх сем жанчын і 23 мужчыны. Большасць з іх — бацькі няпоўнагадовых дзяцей. Раней, 16 жніўня, Лукашэнка памілаваў 30 чалавек, асуджаных за «злачынствы пратэснай скіраванасці». У іх ліку — 14 жанчын і 16 мужчын. Некаторыя маюць сур’ёзныя захворванні.
3 ліпеня на волю выйшлі 18 палітвязняў. Сярод іх — чатыры жанчыны і 14 мужчын, уключаючы Рыгора Кастусёва, які пакутуе на анкалагічнае захворванне.
«Праваабаронцам жа вядомыя прозвішчы 57 палітвязняў, якія выйшлі на волю па памілаванні з ліпеня», — перадае праваабарончы цэнтр «Вясна».