У Мінску прыцягнулі да адміністрацыйнай адказнасці па артыкуле пра «несанкцыянаванае пікетаванне» жыхара Першамайскага раёна. Шторы на ягоным акне нагадалі камусьці бел-чырвона-белы сцяг — і гэты хтосьці выклікаў міліцыю. Дэталі сталі вядомыя з апублікаванага рашэння суда.
Пасля званка ў 102 ад невядомага «пільнага грамадзяніна» (або грамадзянкі) міліцыя прыехала да дома мінчука позна ўвечары, каля паловы адзінаццатай. Супрацоўнікі РУУС зафіксавалі наяўнасць штор на акне і аформілі пратакол па артыкуле 24.23 КаАП.
«Парушыў парадак правядзення масавага мерапрыемства, што выявілася ў актыўным удзеле ў… пікетаванні, якое выявілася ў размяшчэнні ў акне кватэры шторы ў выглядзе незарэгістраванай сімволікі, а менавіта бел-чырвона-белага сцяга. Гэтыя дзеянні ўчыненыя без дазволу Мінгарвыканкама з мэтай публічнага выказвання негатыўнага стаўлення ў дзейнай уладзе», — гаворыцца ў пратаколе.
Мінчук быў адразу ж затрыманы і змешчаны ў ізалятар, прабыў там амаль суткі і быў адпушчаны, відаць, вечарам наступнага дня пасля афармлення дакументаў па справе. Суд над ім прайшоў 26 красавіка.
На паседжанні мужчына віны не прызнаў. Ён заявіў, што шторы на ягоным акне зусім не бела-чырвоныя, а барвовыя ў цэнтры і светлыя з бакоў, і ніякага пікетавання ён не праводзіў. У судзе выступіла сведка — імаверна, яго сямейніца альбо знаёмая. Яна сказала, што сама купляла ў кватэру гэтыя шторы, якія ўяўляюць сабой спалучэнне барвовых, ружовых і празрыстых палотнаў — каб лепш рэгуляваць асвятленне пакоя.
Пры гэтым у матэрыялах справы было апісанне «месца правапарушэння», складзенае міліцыянтамі падчас затрымання мужчыны. Згодна з дакументам, падчас агляду яны выявілі ў пакоі шторы-жалюзі, размешчаныя ў наступным парадку: празрыстая з іерогліфамі, ружовая, чырвоная і белая. Была прыкладзеная і фатаграфія акна кватэры — і суд прыйшоў да высновы, што шторы размешчаныя менавіта ў «бел-чырвона-белым спалучэнні».
У выніку мінчука прызналі вінаватым у несанкцыянаваным пікетаванні і асудзілі на трое сутак адміністрацыйнага арышту.
Мужчына паспрабаваў абскардзіць рашэнне суда, заявіў, што яно неаб’ектыўнае і яго невінаватасць пацвярджаецца паказаннямі сведкі і фотаздымкамі штораў. Аднак Мінгарсуд прызнаў рашэнне раённага суда «законным і справядлівым», яго пакінулі без зменаў.
Чытайце таксама
