Пылавое воблака з пустыні Сахара, якое пачало рухацца над Еўропай 6 красавіка, 9-га дасягнула краін Балтыі і поўначы Беларусі. Пра гэта паведамляе тэлеграм-канал nadvorie.
Адзначаецца, што большая частка пылу пераносіцца ветрам у сярэдніх пластах атмасферы.
«Пра наяўнасць пылу сведчыць аранжавы колер неба ў момант заходу і ранішняга ўзыходу сонца», — гаворыцца ў паведамленні.
Паводле прагнозаў, пыл над Беларуссю будзе стаяць яшчэ пару дзён.
Паводле звестак літоўскага партала Orai ir klimatas Lietuvoje, цяпер воблака пылу выразна відаць на здымках са спадарожніка над поўначчу Польшчы, над Літвой і Беларуссю. У Літве не раяць выходзіць на двор у гэтыя дні тым, у каго ёсць праблемы з дыханнем і алергія на пылок.
На сайце Белгідрамета апублікаваная справаздача, згодна з якой на 8 красавіка і першую палову дня 9 красавіка забруджанне паветра было вышэйшае за дапушчальную норму ў Гомелі, Магілёве і Жлобіне.
«Паводле дадзеных бесперапынных вымярэнняў, у паветры Гомеля (у раёне вуліцы Барыкіна) было зафіксаванае перавышэнне нарматыву гранічна дапушчальнай канцэнтрацыі (ГДК) у 1,9 разу па цвёрдых часцінках фракцыі памерам да 10 мікрон, у паветры Жлобіна (у раёне вуліцы Прыгарадная) і ў паветры Магілёва (у раёне зав. Крупскай) — у 1,1 разу», — гаворыцца ў паведамленні Белгідрамета.
Паводле звестак беларускіх сіноптыкаў, у Мінску ўтрыманне ў паветры азоту аксіду, серы дыяксіду і бензолу было па-ранейшаму істотна ніжэйшым за нарматывы ГДК.