ДзяржСМІ паказалі Відэа з Палінай Шарэнда-Панасюк пасля таго, як Камітэт ААН па ліквідацыі дыскрымінацыі ў дачыненні да жанчын (КЛДЖ) 19 сакавіка папрасіў Беларусь тэрмінова прыняць часовыя меры для яе абароны. Відэа з палітзняволенай з’явілася ў тэлеграм-канале ATN_NEWS.
На відэа, знятым у калоніі, Паліна Шарэнда-Панасюк размаўляе з работніцай тэлеканала. Яна кажа, што нібыта сама вырашыла даць інтэрв'ю дзяржСМІ.
«Якую б лухту сёння ні паказвалі лукашысцкія памыйкі, трэба разумець, што Паліна ратуе свае жыццё. І верыць лукашысцкім памыйкам нельга. Нармальнай сувязі з Палінай няма ўжо тры месяцы. Мы нават блізка не ведаем, што здарылася з ёй за гэты час», — пракаментаваў анонс «інтэрв'ю» яе муж Андрэй Шарэнда.
Нагадаем, брэсцкая актывістка, маці дваіх дзяцей Паліна Шарэнда-Панасюк была затрыманая ў студзені 2021 года і ў чэрвені асуджаная на два гады пазбаўлення волі па арт. 364, 368 і 369 КК (абраза Лукашэнкі і прадстаўніка ўлады, гвалт у дачыненні да міліцыянта). Адбываць пакаранне яе адправілі ў жаночую калонію № 4 у Гомелі.
Жанчына выйшла б на волю яшчэ ў 2022 годзе, але ў калоніі яе пачалі пастаянна адпраўляць у штрафны ізалятар, абвінавачваючы ў парушэнні рэжыму, а ўжо ў лютым 2022-га завялі крымінальную справу па арт. 411 КК «Злоснае непадпарадкаванне патрабаванням адміністрацыі папраўчай установы». У красавіку суд Чыгуначнага раёна Гомеля вынес ёй прысуд — прызнаў вінаватай і прызначыў яшчэ год пазбаўлення волі.
Адбыўшы свой павялічаны тэрмін, Паліна 6 жніўня 2023 мусіла выйсці з калоніі. Аднак яшчэ з восені было вядома, што супраць яе вядзецца другая справа — зноў па арт. 411 КК. У кастрычніку 2023-га жанчыну асудзілі яшчэ на год калоніі. Зняволенне яна адбывае ў ПК № 24.