Ашуканцы прыдумалі новы спосаб падману беларусаў. Цяпер яны пераконваюць людзей у тым, што на руках нельга захоўваць шмат наяўных, а іх лішак просяць пакласці на паказаны імі рахунак, паведамляе прэс-служба МУС.
У міліцыю Гродна звярнулася мясцовая жыхарка, якая расказала, што днямі ёй патэлефанавалі супрацоўнікі банка. Яны пацікавіліся, колькі грошай у яе на руках. Пасля адказу «1000 рублёў» «супрацоўнікі банка» пачалі пераконваць яе ў тым, што яна парушае закон — маўляў, на руках можна трымаць не больш за 500 рублёў.
Для таго каб яе не прыцягнулі да адказнасці за «лішак наяўных» на руках, яны запатрабавалі ад жанчыны пакласці «лішнія грошы» на паказаны імі рахунак.
Жыхарка Гродна пайшла ў банк, але, пагаварыўшы з супрацоўнікам фінансавай установы, зразумела, што ёй тэлефанавалі аферысты.
У міліцыі нагадалі, што рэальныя супрацоўнікі банка ніколі не будуць даведвацца інфармацыю пра вашыя плацежныя карткі, а тым больш патрабаваць перавесці грошы на якія-небудзь рахункі.