У Польшчы з траўня не сталі падаўжаць забарону на пасажырскія чыгуначныя зносіны з Беларуссю, якія скасавалі тры гады таму. Аднак аднаўляць рух цягнікоў не плануецца як мінімум да снежня, піша Rynek Kolejowy.
Польшча ў аднабаковым парадку прыпыніла пасажырскія чыгуначныя рэйсы ў/з Беларусі яшчэ ў сакавіку 2020 года ў сувязі з пандэміяй каранавіруса, з таго часу польскае Міністэрства інфраструктуры пастаянна падаўжала забарону на зносіны паміж дзвюма краінамі.
Апошні раз пастанова пра адмену перавозак дзейнічала да 30 красавіка гэтага года, але з 1 траўня яе не сталі падаўжаць. Аднак гэта не азначае, што цяпер няма фармальных перашкодаў для аднаўлення пасажырскіх зносін з Беларуссю. Прынамсі, польскі бок пакуль не плануе зноў арганізоўваць цягнікі ў нашую краіну.
«Разам з PKP Intercity (польская транспартная кампанія, якая спецыялізуецца на міжгародніх пасажырскіх перавозках. — Заўв. рэд.) мы не плануем запускаць зносіны з Беларуссю — гэта вынікае з цяперашняга гадавога раскладу, які дзейнічае да 9 снежня гэтага года», — заявіў прадстаўнік МЗС Польшчы Шыман Гуптыш.
Пра намер аднавіць чыгуначныя зносіны з Беларуссю таксама не паведамлялася на ўзроўні ваяводстваў.
Як піша выданне, колькасць чыгуначных рэйсаў паміж Польшчай і Беларуссю паступова змяншалася цягам апошніх пятнаццаці гадоў. Яшчэ за некалькі гадоў да прыпынення зносін у пачатку пандэміі каранавіруса знік начны цягнік Варшава — Мінск, таксама быў часова закрыты пераход Кузніца-Беластоцкая — Гродна. Раней, у 2011 годзе, спыніўся рух пасажырскіх цягнікоў праз пераход Чарэмша — Высока-Літоўск.
Беларусь неаднаразова прапаноўвала Польшчы, Літве і Латвіі (балтыйскія краіны таксама адмянілі цягнікі да нас) аднавіць пасажырскія чыгуначныя зносіны, але безвынікова.
Непасрэдныя пасажырскія чыгуначныя зносіны ў Беларусі на гэты момант існуюць толькі з Расіяй.