У Мінску 3 сакавіка абвясцілі прысуды праваабаронцам «Вясны». Пра гэта паведамляе БЕЛТА.
Суддзя прызнаў усіх фігурантаў вінаватымі і прызначыў Алесю Бяляцкаму пазбаўленне волі тэрмінам на 10 гадоў, Уладзіміру Лабковічу — 7 гадоў, Валянціну Стэфановічу — 9 гадоў.
Праваабаронцу Дзмітрыю Салаўёву, які цяпер знаходзіцца за мяжой, прызначылі 8 гадоў пазбаўлення волі.
Пракурор Аляксандр Кароль прасіў у суда больш строгае пакаранне: 12 гадоў для Бяляцкага, 9 гадоў для Лабковіча, 11 гадоў для Стэфановіча і 10 гадоў для Салаўёва.
Прысуд не ўступіў у законную сілу і можа быць абскарджаны.
Відэа з залы суда: БЕЛТА
Нагадаем, 5 студзеня ў судзе Ленінскага раёна Мінска пачаўся разгляд крымінальнай справы супраць прадстаўнікоў праваабарончага цэнтра «Вясна» — лаўрэата Нобелеўскай прэміі міру, кіраўніка арганізацыі Алеся Бяляцкага, яго намесніка Валянціна Стэфановіча і каардынатара кампаніі «Праваабаронцы за свабодныя выбары» Уладзіміра Лабковіча. Пры гэтым усе тры фігуранты не прызналі віну ні па адным з артыкулаў КК, якія ім інкрымінаваліся. Іх абвінавачвалі ў кантрабандзе, арганізацыі і падрыхтоўцы дзеянняў, якія груба парушаюць грамадскі парадак.
