У двары шматкватэрнага дома ў пасёлку Плешчаніцы Лагойскага раёна ноччу 24 студзеня згарэў аўтамабіль начальніка раённай ДАІ Аляксея Трапезнікава. Па падазрэнні ў падпале затрымалі мясцовага жыхара, якога за некалькі месяцаў да інцыдэнту пазбавілі правоў кіроўцы за «п'яную язду». Газета «Мінская праўда» расказала, што папярэднічала інцыдэнту.
Падазраваны ў падпале і яго ахвяра — амаль суседзі: у Плешчаніцах яны жывуць на адной вуліцы. У ноч, калі адбыўся пажар, Opel начальніка аддзялення ДАІ стаяў каля дома.
Сусед міліцыянта прачнуўся ад гуку, які аказаўся гукам выбуху бензабака. Вызірнуў у акно і адразу зразумеў, чыя машына ахопленая агнём. Схапіўшы вогнетушыцель і паведаміўшы па дарозе гаспадару пра здарэнне, сусед кінуўся тушыць аўтамабіль. Яго жонка ў гэты час выклікала пажарных.
— Першая версія, якая адпрацоўвалася, — гэта кароткае замыканне электраправодкі, — расказаў пацярпелы. — Ачаг узгарання знаходзіўся ў раёне капота. Пад сумнеў яна была пастаўленая толькі тады, калі выявілася, што замкі ў машыне працуюць. Значыць, з электрыкай усё ў парадку. У гэты момант я ўжо быў упэўнены, што гэта падпал.
Падчас аператыўна-следчых мерапрыемстваў другая версія была пацверджаная, таму супрацоўнікі міліцыі пачалі шукаць патэнцыйных выканаўцаў.
Аператыўнікі выйшлі на 31-гадовага мужчыну, якога ў лістападзе мінулага года пазбавілі права кіравання за язду на аўтамабілі ў стане ап’янення. Рашэнне па яго справе выносіў Аляксей Трапезнікаў.
Паводле версіі следства, мірыцца з такім рашэннем мужчына не збіраўся, а таму звярнуўся ў суд з абскарджаннем. Больш за тое, цалкам змяніў першапачатковыя паказанні, зафіксаваныя ў матэрыялах допыту. Ён паспрабаваў даказаць, што 250 грамаў каньяку выпіў не да таго, як сеў за руль свайго BMW, а прыехаўшы ў краму. Прычым паказваў яшчэ і месца распівання спіртнога — ганак гандлёвага пункта, размешчанага ў мікрараёне Чысцік.
Тое, што на ганку ён не выпіваў, было пацверджана дадзенымі, атрыманымі з камер відэаназірання, таму новая версія аказалася для суда непераканаўчай, і ранейшае рашэнне засталося ў сіле.
Раней мужчына быў судзімы за разбой і меў за плячыма ўмоўны тэрмін. Плюс яшчэ адзін за ўхіленне ад выплаты аліментаў на адзінага сына.
Паводле звестак «Мінскай праўды», пасля пазбаўлення правоў ён кінуў начальніку аддзялення ДАІ фразу: «Я ж ведаю, на чым вы ездзіце…»
Пасля затрымання падазраванага аператыўнікі высветлілі, што мужчына набраў на запраўцы каністру, абліў гаручым машыну начальніка раённай ДАІ, а затым падпаліў. Акрамя таго, фігуранткай справы стала і знаёмая затрыманага, якая падвезла яго на АЗС, а потым высадзіла непадалёк ад месца злачынства.
У дачыненні да жыхара Лагойскага раёна распачалі крымінальную справу за наўмыснае знішчэнне або пашкоджанне маёмасці агульнанебяспечным спосабам і нанясенне значнай шкоды. Санкцыя артыкула прадугледжвае да 10 гадоў пазбаўлення волі.