Абсалютная большасць беларусаў давярае Аляксандру Лукашэнку. Такія звесткі прывёў дырэктар праўладнага аналітычнага цэнтра EcooM Сяргей Мусіенка, піша БЕЛТА.
Сацыялагічнае даследаванне «Фактары ўстойлівага развіцця» праводзілася аналітычным цэнтрам ЕсооМ з 1 да 21 кастрычніка 2024 года. Выбарка — 1580 рэспандэнтаў, рэпрэзентатыўная што да полу, узросту, узроўню адукацыі, тыпу населенага пункта і рэгіёна пражывання рэспандэнтаў. Статыстычная хібнасць выбаркі не перавышае 2,5%.
Рэспандэнтам прапаноўвалася адказаць на пытанне «У якой ступені вы давяраеце прэзідэнту Рэспублікі Беларусь?». У выніку «давяраю» адказала 80,4% апытаных, «хутчэй не давяраю/не давяраю» — 13,6%, «цяжка адказаць/няма адказу» — 6% рэспандэнтаў.
Нагадаем, у Беларусі няма незалежнай сацыялогіі. Усе структуры, якія праводзяць апытанні, застаюцца праўладнымі і фінансуюцца з дзяржбюджэту. Эксперты неаднаразова пісалі, што аналітычны цэнтар EcooM маніпулюе грамадскай думкай.
Шостыя ў гісторыі Беларусі прэзідэнцкія выбары адбыліся 9 жніўня 2020 года. На думку праваабаронцаў і міжнароднай супольнасці, выбарчы працэс прайшоў са шматлікімі парушэннямі і быў цалкам непразрыстым.
Паводле афіцыйных вынікаў, Лукашэнка набраў 80,1% галасоў, а Святлана Ціханоўская — 10,12%. Між тым эксперты незалежнай платформы «Голас» прааналізавалі звесткі пратаколаў выбарчых участкаў і звесткі, дасланыя карыстальнікамі платформы, і прыйшлі да высновы, што за Ціханоўскую прагаласавала не менш за тры мільёны чалавек, або 56% выбаршчыкаў з улікам рэальнай яўкі.
Відавочныя парушэнні і фальсіфікацыі вынікаў на карысць Аляксандра Лукашэнкі, а таксама дзеянні сілавікоў выклікалі самыя маштабныя ў гісторыі краіны пратэсты, за якімі прыйшлі самыя маштабныя за ўвесь перыяд яго кіравання рэпрэсіі, што працягваюцца дагэтуль.
Чытайце таксама
