На беларуска-польскай мяжы ў пункце пропуску «Брэст» з 30 верасня пачалі эксперымент. Для кіроўцаў легкавых аўтамабіляў з’явілася магчымасць выехаць з зоны чакання. Цяпер неабавязкова сядзець гадзінамі ў аўто, дачакацца сваёй чаргі можна ў любым зручным месцы. «Люстэрка» расказвае, як уладкаваная новая сістэма, колькі часу займае перасячэнне мяжы і што пра новаўвядзенне думаюць падарожнікі.
Як гэта працуе
Цяпер кіроўцы легкавікоў прыязджаюць да мяжы і рэгіструюцца ў электроннай чарзе. Далей можна з’ехаць у зручнае для вас месца і там чакаць, пакуль падыдзе ваш час перасякаць мяжу. Мяркуючы з водгукаў падарожнікаў, большасць едзе ў Брэст — да сябе дадому, да сяброў ці ў гатэль.
Даведацца, як рухаецца чарга і ці не час вам вяртацца, можна праз сайт ці праз тэлеграм-бот (там трэба ўвесці нумар сваёй машыны). Ёсць дадатковая паслуга паведамлення праз СМС ці званок. Пасля паведамлення ў кіроўцы ёсць гадзіна, каб прыехаць на мяжу, зноў заехаць у зону чакання, адзначыцца і скіравацца ў пункт пропуску для перасячэння мяжы.
Цана пытання:
- 12 рублёў за рэгістрацыю;
- 5 рублёў за званок ці 3 рублі за СМС-паведамленне (яго заказваць неабавязкова);
- 40 рублёў за перасячэнне мяжы (гэты збор дзейнічае з 2021 года, улады заяўлялі, што ён «скіраваны на барацьбу з каранавіруснай інфекцыяй»).
Зарэгістравацца ў сістэме загадзя, да прыезду на мяжу, нельга. Людзі з правам прыярытэтнага перасячэння мяжы (напрыклад тыя, у каго ёсць пасведчанне інваліда) могуць без чаргі ехаць у спецыяльны павільён.
Колькі часу цяпер ідзе на праезд
Падарожнікі дзеляцца ў тэматычных чатах досведам перасячэння мяжы паводле новых правілаў. З іх словаў, на выезд з Беларусі ўсё яшчэ ідзе каля сутак. Ніжэй — некалькі справаздачаў тых, хто перасякаў мяжу пасля запуску новай сістэмы (мы змянілі імёны аўтараў з меркаванняў іх бяспекі).
- Віктар зарэгістраваўся на мяжы 1 кастрычніка ў 23.40. Вярнуцца ў чаргу яго выклікалі 2 кастрычніка ў 17.20. Пасля афармлення мяжу ён перасёк у 21.00 і выехаў з польскага боку ў 22.40. Агулам пайшло 23 гадзіны.
- Міхаіл зарэгістраваўся ў электроннай чарзе 2 кастрычніка ў 15.00. Назад яго запрасілі 3 кастрычніка, а 6-й раніцы. Польскія службоўцы адправілі аўто на дадатковы дагляд, у выніку мужчына выехаў з польскага боку ў 12.50. Агулам праходжанне мяжы заняло каля 22 гадзін.
- Аксана зарэгістравалася ў электроннай чарзе 3 кастрычніка ў 13.10. Яе выклікалі на пункт пропуску 4 кастрычніка ў 5.05. Пасля ўсіх фармальнасцяў на польскім баку яна выехала ў 10.20. Агулам выдаткавала каля 21 гадзіны.
Як адрэагавалі падарожнікі
Хоць перасячэнне мяжы ўсё яшчэ адбірае шмат часу, падарожнікі радыя, што больш не трэба гадзінамі сядзець у машыне. Вось некалькі меркаванняў з тэматычнага чата:
- «Шчыра кажучы, лепш за кватэру 40 рублёў заплаціць, чым у машыне, як сабака, спаць».
- «Стала на парадак лепш, чым было раней. Народу пачне ездзіць значна больш, але пры тым, што не трэба стаяць 15 гадзін у чарзе на ўзбочыне, а можна нармальна з’ехаць паспаць — стала выдатна!»
- «Ніхто цябе не абганяе, не ўлазіць, няма машын, якія стаяць за кагосьці. Прыехаў, зарэгістраваўся і паехаў па сваіх справах ці проста прабавіў час так, як хочаш».
Пра новую сістэму расказалі і карыстальнікі TikTok.
— Атрымаўся час чакання 17 гадзін прыблізна, але яны ўсе былі дома, у хатніх справах, — падзялілася карыстальніца alesiavpl. — Таму цяпер вельмі класна і зручна праязджаць мяжу. Але брэсцкім. Бо калі вы не з Брэста, трэба ўсё роўна думаць, куды ехаць — да сяброў або ў гатэль. Але ўжо не на мяжы суткамі стаяць! Клас, я ў захапленні, можна ездзіць спакойна.
Карыстальніца пад нікам P@OLYA прапанавала ўзнагародзіць аўтара новай сістэмы.
@prokopovich_olga 🇧#рекомендации #fypシ #recommendations ♬ оригинальный звук — P@OLYA
— Гэта так зручна! Я не ведаю, хто гэта прыдумаў, я не ведаю, што гэта за цуд-чалавек. Напэўна, уся Беларусь удзячная, — расказала яна. — <…> Дайце хто-небудзь чалавеку, які гэта прыдумаў, прэмію, грамату, медаль, кватэру ўрэшце. Ён выратаваў столькі людзей. Гэта крута, малайцы!
Чытайце таксама
