Беларусь 13 чэрвеня адклікала свайго амбасадара ў Арменіі Аляксандра Канюка. Пра гэта расказаў афіцыйны прадстаўнік МЗС нашай краіны Анатоль Глаз.
— Мы ўсе бачым, наколькі складаная ўнутрыпалітычная сітуацыя складваецца сёння ў Арменіі. Як імкліва абвастраецца ўнутры краіны. І ў розных людзей розная рэзістэнтнасць да эмацыйных нагрузак. Гэта мы можам зразумець. Але мы не разумеем, пры чым тут Беларусь. Прадстаўнік амбасады Арменіі сёння выкліканы ў МЗС, каб паспрабаваць растлумачыць нам гэтае пытанне. Улічваючы развіццё сітуацыі, наш амбасадар з Ерэвана найбліжэйшым часам таксама прыбудзе ў Мінск, — сказаў Анатоль Глаз.
Афіцыйны прадстаўнік МЗС абвінаваціў Ерэван у спробе зрабіць з Беларусі «знешняга ворага» і такім чынам «адцягнуць увагу ад унутраных праблем».
— Гэта вельмі недальнабачная пазіцыя, — сказаў на заканчэнне Глаз.
Спікер падкрэсліў, што Беларусь і Арменію «звязваюць даўнія блізкія, сяброўскія адносіны і агульная гісторыя, а на сённяшні дзень яшчэ і ўзаемавыгадны гандаль, а таксама цесныя дзелавыя кантакты».
— Мы не збіраемся гэтыя адносіны пагаршаць, колькі б армянскае кіраўніцтва да гэтага ні падштурхоўвалі знешнія гульцы. Мы ніколі не рабілі нічога на шкоду нашым сябрам, не ўмешваемся ва ўнутраныя справы, паважаем армянскі народ і шчыра жадаем яму кіраўнікоў, якія будуць сапраўды думаць пра будучыню краіны і дабрабыт людзей, — сказаў на заканчэнне Глаз.
Раней амбасадара Арменіі ў Беларусі выклікалі ў Ерэван для кансультацый. Пра тое, калі ён вернецца ў Мінск, нічога не паведамляецца.
Нагадаем, сёння, 13 чэрвеня, прэм’ер-міністр Арменіі Нікол Пашынян выступіў з рэзкімі заявамі на адрас Беларусі. У прыватнасці, ён заявіў, што ні ён, ні іншы чыноўнік не наведае Беларусь, пакуль прэзідэнцкую пасаду там займае Лукашэнка, — праз заявы апошняга ў Азербайджане.
Пашынян адзначыў, што адносна АДКБ пазіцыя афіцыйнага Ерэвана не зменіцца, пакуль Беларусь не выйдзе з АДКБ ці не прынясе такіх прабачэнняў, якія будуць прымальныя для армянскага народа.
Словы, на якія спасылаецца Пашынян, былі сказаныя Аляксандрам Лукашэнкам 17 траўня на сустрэчы з прэзідэнтам Азербайджана Ільхамам Аліевым — з іх вынікала, што Лукашэнка быў у курсе планаў Аліева напасці на Карабах.
«Я яшчэ падумаў, успомніў нашую размову перад вайной, перад вашай вызваленчай вайной, калі мы па-філасофску разважалі за абедам удваіх. Тады мы зразумелі, што ў вайне перамагчы можна. Гэта важна. Вельмі важна ўтрымаць гэтую перамогу», — цытавалі Лукашэнку азербайджанскія СМІ, у паведамленнях ягонай прэс-службы гэтых словаў няма.