Тэрытарыяльныя прэтэнзіі Польшчы да Беларусі «відаць няўзброеным вокам». Пра гэта заявіў памочнік міністра абароны, начальнік Галоўнага ўпраўлення ідэалагічнай працы Мінабароны Леанід Касінскі 29 красавіка падчас анлайн-сустрэчы беларускіх і расійскіх прапагандыстаў «Мінск-Масква».
«Калі ў Польшчы ёсць тэрытарыяльныя прэтэнзіі да нашай краіны і яны відаць няўзброеным вокам, іх выказвалі асобныя польскія палітыкі, то чаму мы не можам казаць пра гэтую сітуацыю як пра нейкую рызыку, пагрозу ці выклік?» — заявіў ён.
Паводле яго, улады робяць «адпаведныя крокі па стрымліванні, недапушчэнні, каб гэты канфлікт на глебе тэрытарыяльных прэтэнзій мог быць магчымым».
Пры гэтым Касінскі не прывёў якіх-кольвек выказванняў польскіх уладаў, якія пацвярджаюць ягоную заяву.
Нагадаем, нягледзячы на тое, што польскія ўлады не заяўлялі пра якія-кольвек тэрытарыяльныя прэтэнзіі да Беларусі, Аляксандр Лукашэнка і яго атачэнне пастаянна выкарыстоўваюць гэты наратыў у сваіх заявах.
Перыядычна Лукашэнка таксама запэўнівае Польшчу ў тым, што ў Беларусі няма тэрытарыяльных прэтэнзій да Польшчы.
«Мы не прэтэндуем ні на Вільню, ні на Беласточчыну, ні на расійскія, ні на ўкраінскія землі. Нам дастаткова таго, што гістарычна нам дасталася. Гэта нашыя беларускія землі», — заявіў ён 16 лютага гэтага года.
Пры гэтым Лукашэнка абвінаваціў Захад і беларускіх апазіцыянераў, якія пакінулі краіну, у абмеркаванні правоў Польшчы на заходнія тэрыторыі Беларусі.