Забараніўшы ўвоз разнастайных тавараў з Літвы ў Беларусь, беларускія ўлады наклалі санкцыі на ўласны народ, заявіў міністр замежных справаў Літвы Габрыэлюс Ландсбергіс, перадае BNS.
«Яны ўвялі санкцыі супраць саміх сябе. Па-іншаму я гэта назваць не магу. Гэта санкцыі супраць уласнага народа», — лічыць Ландсбергіс.
На яго думку, забарона на імпарт з Літвы ў Беларусь асобных тавараў змусіць тую частку літоўскага бізнесу, якая экспартавала сваю прадукцыю ў Беларусь, скіраваць яе ў іншыя краіны.
«Для нашай эканомікі, хоць яна і невялікая, гэта сродак спрыяння дыверсіфікацыі. То-бок нават тыя невялікія групы тавараў, якія раней паступалі ў Беларусь, мы скіруем у іншыя месцы», — сказаў кіраўнік літоўскага МЗС.
Нагадаем, увечары 14 сакавіка Беларусь увяла забарону на ўвоз шэрагу тавараў з тэрыторыі Літвы, незалежна ад краіны іх паходжання. Гэта карыстаныя адзенне і запасныя часткі да транспартных сродкаў, шыны, алкагольная прадукцыя, прадукты харчавання, будаўнічыя вырабы і бытавая тэхніка.
Названыя забароны не закранаюць тавары, якія ўвозяцца на тэрыторыю Беларусі для асабістага карыстання.
Ва ўрадзе растлумачылі, што ўвядзенне забаронаў — мера ў адказ на дзеянні Літвы. У МЗС Беларусі спадзяюцца, што такое рашэнне «негатыўна адаб’ецца на працы шматлікіх літоўскіх лагістычных аператараў і прывядзе да адчувальнай страты іх даходаў у сувязі з істотным скарачэннем тавараабароту».
Літва з 1 сакавіка закрыла пункты пропуску «Лаварышкес» (з беларускага боку — «Катлоўка») і «Райгардас» («Прывалка»). Літоўскі ўрад патлумачыў гэта тым, што мясцовыя службы зазнаюць дадатковую нагрузку па праверцы і кантролі пасля таго, як Польшча і Латвія пакінулі толькі па адным памежным пераходзе на мяжы з Беларуссю. Раней, з 18 жніўня мінулага года, Літва таксама закрыла два пункты пропуску на мяжы з Беларуссю: «Шумскас» (з беларускага боку «Лоша») і «Твярачус» («Відзы»).