Суд у Пакістане 30 студзеня асудзіў на 10 гадоў турэмнага зняволення па справе пра разгалошванне дзяржаўнай таямніцы былога прэм’ер-міністра Імрана Хана, які ў верасні 2021 года сустракаўся з Аляксандрам Лукашэнкам падчас саміту АДКБ і ШАС у Душанбэ.
Паводле абвінавачання, Хан апублікаваў змест сакрэтнай тэлеграмы, адпраўленай амбасадарам Пакістана ў Вашынгтоне ўраду, піша Руская служба Бі-бі-сі.
Імран Хан, якога адхілілі ад пасады прэм’ер-міністра ў 2022 годзе, ужо мае трохгадовы турэмны тэрмін — раней яго прызналі вінаватым у карупцыі. У вытворчасці знаходзяцца яшчэ каля сотні судовых справаў супраць экс-прэм'ера. Сярод выстаўленых яму абвінавачанняў — карупцыя, тэрарызм і нават блюзнерства.
Хан настойвае, што кампанія супраць яго была арганізаваная, каб перашкодзіць яго вяртанню ў офіс. Новы 10-гадовы прысуд вынесены за тыдзень да ўсеагульных выбараў у Пакістане і ўжо напэўна пазбаўляе яго не толькі любых шанцаў вярнуцца ў палітыку, але і проста выйсці на волю.