Чыноўнікі заняліся перадзелам інкасатарскага бізнесу — дзяржава падмяла яго пад сябе. 24 ліпеня Аляксандр Лукашэнка падпісаў спецыяльны ўказ, паводле якога выключнае права на заняткі такой дзейнасцю ўводзіцца для дзяржкампаніі «Белінкасгруп». Гаворка пра перавозку наяўных грошай і каштоўнасцяў.
Так, ва ўказе прапісалі, што інкасацыю і перавозку наяўных грошай і іншых каштоўнасцяў адносяць да відаў дзейнасці, на якія распаўсюджваецца выключнае права дзяржавы. «Рэалізацыя гэтага выключнага права ўскладзеная на ААТ «Белінкасгруп», — паведамляе прэс-служба Аляксандра Лукашэнкі.
Таксама ўдакладняецца, што ствараецца цэнтралізаваная лагістычная сістэма перавозкі каштоўнасцяў падчас аказання касава-інкасатарскіх паслуг.
Да гэтага інкасацыяй і перавозкай наяўных грошай і іншых каштоўнасцяў маглі займацца таксама прыватнікі.
Нагадаем, кампанія «Белінкасгруп» з’явілася на рынку інкасацыі ў 2018 годзе. Яе заснавалі Нацбанк (44% акцый), «Беларусбанк» (49%) і «Белаграпрамбанк» (7%). Меркавалася, што гэтая фірма зойме дзве траціны рынку наяўнага грашовага абароту.
Другім буйным гульцом было даччынае прадпрыемства «БПС-Сбербанка» — «ІНКАС.ЭКСПЕРТ», доля гэтай фірмы на рынку у 2018 годзе ацэньвалася ў 22%. Астатнія ўдзельнікі рынку займалі невялікую долю.
Стварэнне «Белінкасгруп» тлумачылася аптымізацыяй дублявальных функцый банкаў у галіне інкасацыі, перавозкі, апрацоўкі і захоўвання каштоўнасцяў, зніжэння выдаткаў на ўтрыманне матэрыяльна-тэхнічных рэсурсаў, скарачэнне ў Беларусі колькасці спецыяльнага транспарту і зброі ў абароце.
Характэрна, што стварэнне «Белінкасгруп» у Нацбанку раней матывавалі ў тым ліку стварэннем на рынку «нармальнай канкурэнцыі».
«Натуральна, будзе захоўвацца нармальнае канкурэнтнае асяроддзе, і ў банкаў будзе выбар, паслугамі якой кампаніі карыстацца. А гэта будзе абавязваць кампанію аказваць якасныя паслугі», — каментаваў раней кіраўнік Нацбанка Павел Калаўр.
Чытайце таксама
