Мінская блогерка Алеся Белазорава, вядомая пад нікам Atlanta, цяпер адпачывае ў Мілане. У Алесі Белазоравай больш за 860 тысяч падпісчыкаў у TikTok (а таксама 137 тысяч у Instagram). Дзяўчына паскардзілася на тое, як ёй сапсавалі настрой у фірмовай краме Louis Vuitton, піша «Наша Ніва».
— Мне не прадалі рэмень, бо я з Беларусі, — кажа блогерка, выходзячы з буціка. — Вось такая вось Еўропа!
Пасля таго як Расія ў 2022 годзе пачала поўнамаштабную вайну ва Украіне, ЗША і краіны Еўрасаюза ўвялі некалькі пакетаў санкцый. Сярод забаронаў — увоз у Расію прадметаў раскошы. Калі казаць пра вопратку, то пад забарону трапіла ўсё, што каштуе больш за 300 еўра. Гэта распаўсюджваецца як на юрыдычных, так і на фізічных асобаў.
Перыядычна расійскія блогеры скардзяцца, што той ці іншы люксавы брэнд адмовіўся нешта ім прадаць. Прадаваць прадметы раскошы грамадзянам Беларусі тэарэтычна не забаронена. Аднак калі прадстаўнікі брэнда лічаць, што пакупнік можа перапрадаць іх рэч кудысьці ў Расію, яны таксама могуць адмовіцца прадаваць свой люксавы тавар.
@belozorovaa Вот так 🙄
Магчыма, праз гэта Алеся і засталася без рэменя Louis Vuitton, дапусціла «Наша Ніва».
Сама блогерка стала вядомая ў 2022 годзе. Яна праславілася тым, што публікавала ў TikTok відэа са сваёй працы на канвееры завода «Атлант» (гэта была летняя падпрацоўка, пакуль дзяўчына з Магілёўскай вобласці вучылася на маркетолага ў БДТУ).
Чаму ж Алеся не знайшла падпрацоўку па сваёй спецыяльнасці, а пайшла збіраць лядоўні? Прычына была дастаткова зразумелай — каб на наступны навучальны год універсітэт даў інтэрнат, летам трэба было папрацаваць у студатрадзе.
— Прапаноўвалі розныя варыянты, але на некаторых я ўжо працавала і вырашыла пайсці на нешта новае для сябе. Плюс на заводзе было бясплатнае харчаванне.
Дзяўчына паказвала свой разліковы ліст за жнівень 2022 года: тады ёй заплацілі 1043 рублі.
Відэа блогеркі набіралі сотні тысяч, а то і мільёны праглядаў.
— Я працавала на канвееры. Так, было вельмі складана. Сутнасць заключалася ў тым, каб я пракладвала праводку для лямпачак лядоўні і прыкручвала вечка двума самарэзамі. Тэхніка ішла з вялікай хуткасцю, першы час я не паспявала, таму да мяне па чарзе падбягалі розныя супрацоўнікі і дапамагалі. На заводзе ўсе прывыклі, што летам працуе шмат студэнтаў і ні ў кога не атрымліваецца адразу, — тлумачыла тады блогерка.
На такой хвалі папулярнасці кіраўніцтва «Атланта» прапанавала дзяўчыне пастаянную працу — праўда, спачатку на 0,25 стаўкі (усё ж Алеся яшчэ вучылася) у рэдакцыі газеты завода. Яна пагадзілася.
Першы заробак наўрад ці прыемна здзівіў Алесю. На рукі яна атрымала каля 152 рублёў (хоць працавала кожны дзень па дзве гадзіны).
Пазней дзяўчыну перавялі ў аддзел кіравання персаналам. Але ўжо ў 2023 годзе яна звольнілася — кажа, што навучанне забірала шмат часу.
Здаецца, за год жыццё звычайнай студэнткі моцна змянілася. У гэтым лістападзе Алеся дзялілася з падпісантамі, як лётала ў Турцыю, каб зрабіць рынапластыку (ужо другую, бо хацела выправіць вынікі першай, зробленай у Беларусі).
