Хірург з амерыканскага штата Флорыда выдаліў пацыенту печань замест селязёнкі. Пра гэта піша The State. Гэта стала яго трэцяй такой памылкай — і, магчыма, стане канцом яго медыцынскай кар’еры.
Томаса Шакноўскі часова пазбавілі ліцэнзіі, пасля таго як у жніўні ён выпадкова выразаў пацыенту Уільяму Браяну здаровую печань замест хворай селязёнкі. Паводле калегаў медыка, скончыўшы аперацыю, той паклаў на стол печань і заявіў, што паспяхова выдаліў селязёнку. Проста на аперацыйным стале ў пацыента пачаўся моцнае крывацёк, і яго не змаглі выратаваць.
Высветлілася, што падобным чынам Шакноўскі памыліўся ўжо трэці раз. У траўні 2023 года медык памылкова выдаліў пацыенту частку падстраўнікавай залозы замест наднырачніка. У ліпені таго ж года Шакноўскі мусіў правесці прызначаную жанчыне ілеястамію — стварэнне ў брушной поласці стомы для вывядзення калавых масаў. Аднак ён пераблытаў аперацыі і зрабіў пацыентцы рэзекцыю кішэчніка, што прывяло да яго перфарацыі. Яе стан пагоршыўся, і неўзабаве яна памерла.
На Шакноўскі падалі скаргу з заявай, што ён «прадэманстраваў няздольнасць ажыццяўляць медыцынскую практыку з разумным майстэрствам і бяспекай праз адсутнасць базавых медыцынскіх ведаў падчас лячэння». На цяперашні час ён не можа працаваць у штатах Флорыда і Алабама. Адвакат сям'і загінулага Уільяма Браяна, Джо Зарзаўр, расказаў, што ўзяўся за гэтую справу таму, што раней яго кліентам быў іншы пацыент Шакноўскі, у якога пасля аперацыі пачаліся праблемы з кішэчнікам, — доктар пагражаў яму, забараняючы звяртацца да адваката.
Нагадаем, падобныя выпадкі адбываліся і ў Беларусі. У 2023 годзе мы пісалі пра жыхара Лепеля, які выйграў суд у хірурга-анколага, што выразаў мужчыну замест хворай ныркі здаровую.
Чытайце таксама
