Сяміразовы чэмпіён «Формулы-1», мяркуючы з усяго, наведаў вяселле сваёй дачкі Джыны-Марыі, якое прайшло ў асабняку Шумахераў на Мальёрцы, піша Yahoo Sport.
Шэраг крыніцаў сцвярджае, што экс-пілота ўпершыню з 2013 года ўбачыла не толькі «найбліжэйшае кола» людзей. Паведамляецца, што Шумахер жыве ў доме на Жэнеўскім возеры ў Швейцарыі, але яго часта возяць на ўласную вілу на Мальёрцы, дзе і прайшла шлюбная цырымонія.
Джына-Марыя выйшла замуж за Іэна Бэтке. Гасцям, у ліку якіх быў і брат Шумахера Ральф, забаранялася праносіць на вяселле тэлефоны, за чым сачылі сек’юрыці. Меры бяспекі былі вельмі строгімі, таму ніводнай фатаграфіі былога гоншчыка няма.
Урачыстая цырымонія доўжылася прыкладна паўгадзіны, пасля чаго пачалося само святкаванне. Невядома, колькі часу Міхаэль прысутнічаў на мерапрыемстве.
Нагадаем, у снежні 2013 года Шумахер атрымаў траўму галавы падчас катання на горных лыжах на французскім курорце Мэрыбэль. Ён выжыў, але з таго часу яго больш не бачылі на публіцы. Сям’я былога пілота «Формулы-1» старанна хавае ад старонніх любыя звесткі пра стан здароўя Міхаэля.
Шумахер — сяміразовы чэмпіён свету. На асобных этапах немец перамагаў 91 раз. Гоншчык заваяваў два з сямі тытулаў у складзе каманды Benetton у 1994 і 1995 гадах, а з 2000 да 2004 года пяць разоў выйграваў, выступаючы за Ferrari.
Чытайце таксама
