Мужчыну, які напярэдадні галяком бегаў па Варшаўскім мосце на мяжы з Польшчай, затрымалі і адправілі ў ізалятар, яго асоба высвятляецца. На парушальніка могуць завесці крымінальную справу за гвалт у дачыненні да службовай асобы, паведаміў расійскаму інфармагенцтву Sputnik Беларусь афіцыйны прадстаўнік ДПК Антон Бычкоўскі.
Інцыдэнт адбыўся каля 17.40 панядзелка ў пункце пропуску «Брэст — Тэрэспаль». Мужчына спрабаваў перасекчы дзяржмяжу Беларусі з боку Польшчы без адзення і дакументаў.
— Мужчына паводзіўся неадэкватна, кепска арыентаваўся ў прасторы і аказаў супраціў памежнаму нараду. Праведзены медыцынскі агляд затрыманага выявіў стан наркатычнага ап’янення, — расказаў Бычкоўскі.
Парушальнік затрыманы і змешчаны ў ізалятар часовага ўтрымання для далейшага разбіральніцтва. Цяпер яго асоба высвятляецца.
Мужчыну прыцягнуць да адказнасці за наўмыснае незаконнае перасячэнне дзяржмяжы Беларусі, а таксама парушэнне заканадаўства пра прававое становішча замежных грамадзян і асобаў без грамадзянства.
Акрамя таго, у дачыненні да парушальніка распачатая праверка па прыкметах складу злачынства, прадугледжанага ч. 1 арт. 366 КК (Гвалт у дачыненні да службовай асобы, якая выконвае службовыя абавязкі).
Нагадаем, пра інцыдэнт на мяжы ўвечары 1 ліпеня расказаў чытач «Люстэрка». Паводле відавочцы, голы мужчына збег па Варшаўскім мосце з Польшчы ў Беларусь. «Што з ім было далей, невядома. Нейкі час польскія памежнікі не прымалі транспарт, які ехаў з РБ», — адзначыў чытач.
Пра тое, што каля 19.00 польскі бок спыніў прыём аўтамабіляў і аўтобусаў, паведамляе і «Віртуальны Брэст». На мост маглі трапіць толькі тыя, хто ехаў у напрамку Беларусі.
Адзначаецца, што станам на 21.30 рух быў цалкам адноўлены ў абодва бакі.